Carina van der Walt
Poëzie

Die Vlieënde Hollander

                                       voortsetting van ’n legende

Vol verwagtings het die ou bus destyds

in die omarming van twee oseane

teen Kaappunt uitgery.                                               

Sy naam was ’n eggo en ’n voorspelling.

Dolleeg gly ’n splinternuwe bus onlangs

onderweg na Robbeneiland

teen die helikopterkabel áf                                         

en beland as spookbus

tussen langvergane skepe

op die seebodem –

verlate onderwater halte  

tussen Tafelbaai en Robbeneiland.                            

Kaap van Storms.                                                        

Maar op volmaannagte gly

die busdeure oop en stap

kaptein Van der Decken in

met sy enkelkaartjie na Kaapstad.

Dreigend beweeg die onderwater stilte en dwing

die bus terug na die eiland van verworpenes.

Heen en weer soos eb en vloed

sonder moeite oor sandbanke

en deur riwwe ruwe rots ry

die bus met sy passasier

eindeloos tussen seewier en –dier.

Verraaierswaters.